ఆయనే ఉంటే మంగలితో పనేంటి... అంటూ పల్లెటూళ్లలో వినిపించే ముతక సామెత మాదిరిగా ఉన్నది ప్రస్తుతం తెలంగాణ తెలుగుదేశం నాయకుల పరిస్థితి. తెదేపా ఎమ్మెల్యేలు ప్రస్తుతం మింగలేక కక్కలేక.. తెలంగాణ ప్రాజెక్టులకు వ్యతిరేకంగా వ్యవహరిస్తున్న చంద్రబాబు నాయుడును నిలదీయలేక, అలాగని ఊరుకుంటే.. తమ పార్టీ పని తెలంగాణలో అధోగతి అవుతుందని భయపడుతూ.. సతమతం అవుతున్నారు. అలాంటి కీలక సమయంలో ఇప్పుడు తెలంగాణ రాష్ట్ర సమితి నాయకులు.. వారిని మరింత ఇరుకున పెట్టే సవాళ్లు విసురుతున్నారు.
తెలంగాణ తెదేపా నేతలు ముందుగా చంద్రబాబునాయుడును నిలదీయాలని తెరాస వారు డిమాండ్‌ చేస్తున్నారు. పాలమూరు ప్రాజెక్టును ఆపివేయడానికి ఏపీ సర్కారు చేస్తున్న కుట్రలను అడ్డుకోవాలని తెతెదేపాను కోరుతున్నారు. ఇప్పుడు పాదయాత్రల పేరుతో పథకాల్ని నిలిపేయించే కుట్ర చేస్తున్న తెలుగుదేశం నాయకులు.. అసలు చంద్రబాబును ఎందుకు నిలదీయడం లేదో అర్థం కావడంలేదని ఆరోపిస్తున్నారు. తెతెదేపా నాయకులు.. ప్రజల వైపు ఉంటారో.. చంద్రబాబు వైపు ఉంటారో తేల్చుకోవాలని తెరాస డిమాండ్‌ చేస్తున్నది.
ఈ వ్యవహారం గమనించిన వారు మాత్రం.. ఆయనే ఉంటే మంగలి ఎందుకు అన్న సామెత చందంగా ఉన్నదని నవ్వుకుంటున్నారు. చంద్రబాబును నిలదీయగల సత్తా ఉంటే గనుక.. తెతెదేపా తెలంగాణలో మరింత బలంగానే ఉండేదని.. అది లేదుగనకనే ఈసురోమంటూ ఉన్నదని వ్యాఖ్యానిస్తున్నారు.
No comments:
Post a Comment